Suporta sang pamilya kag mapag-on nga pagsalig sa Diyos ang nangin liyabi sang 3 time-gold medalist sa iya makasaysayan nga pag-angkon sang tatlo ka bulawan nga medalya sa Palarong Pambansa 2026.
Ini ang naghatag sa iya sang kusog kag inspirasyon agud mangin kampyon sa Shot Put, Long Jump kag 100-meter Dash.
Sa interview sang Bombo Radyo kay Keith Izzy Mendoza, iya ginpahayag nga indi madali ang iya gin-agyan antes niya nalab-ot ang kadalag-an.
Suno kay Mendoza, madamo nga oras ang iya ginhalad sa ensayo kag pagpangabudlay agud mapauswag ang iya abilidad sa nagkalain-lain nga larang sang athletics. Bisan pa sa mga kakapoy kag mga pagsulay nga iya naagyan, nagpadayon siya bangud sang wala untat nga suporta sang iya pamilya.
Pahayag pa niya, sa kada kompetisyon nga iya ginapasakupan, ginadala niya ang leksyon sang pagkamapainubuson, disiplina kag pagrespeto sa kada atleta nga malaupod niya.
Nagapati man ini nga ang kada medalya nga iya nabaton indi lamang para sa iya kaugalingon kundi para man sa iya pamilya, mga coaches kag tanan nga nagasuporta sa iya athletic career.
Nagalaum man ang natungdan nga mangin inspirasyon siya sa iban nga mga kabataan nga may handom man sa sports.
