ROXAS CITY – Aprubado na sa ginpatigayon nga session sang Sangguniang Panlalawigan ang request para sa supplemental budget ni Governor Esteban Evan “Nonoy” Contreras para sa Roxas Memorial Provincial Hospital (RMPH) kag iban pa nga mga district hospitals sa probinsya sang Capiz.
Ang amo nga supplemental budget nagalab-ot sa P66,499,935 nga gamiton para sa pagbakal sang mga Personal Protective Equipment’s (PPE’s) kag iban pa nga mga kinahanglanon nga gamiton sang mga ospital may kaangtanan sa Coronavirus Disease 2019 (COVID19).
Ini ang ginkasugtan sang provincial board matapos nga ginbuhinan ang nasambit nga supplemental budget nagikan sa una nga request nga nagalab-ot sa kapin 84 milyones pesos.
Ang nasambit nga pondo nga napapasar, 40 milyones diri ang nagikan sa savings sang 20% development fund humalin sang tuig 2017 tubtob 2019 samtang ang nabilin naman ang pagakuhaon sa saving sang calamity fund humalin sang tuig 2011 tubtob 2018.
Samtang, gin-aprubahan man sang Sangguniang Panlalawigan ang letter request sang gobernador nga hatagan sang isa ka milyon ka pesos ang kada mga kabanwahanan sa probinsya kag siyudad sang Roxas.
Ini agud gamiton sang mga Local Government Units (LGU’s) sa pagbakal sang mga kinahanglanon sang ila mga pumuluyo sa ila tagsa ka mga lugar.
Mahibaluan nga nagalab-ot sa 17 milyones pesos ang kabug-osan nga kantindad sang nasambit nga pondo.
