ROXAS CITY – Aprubado na sang Sangguniang Panlalawigan ang supplemental budget nga P300 milyon para sa pagbakal sang lote nga pagatindogan sang bag-o nga probinsyal kapitol sa Pueblo de Panay.
Sa interview sang Bombo Radyo kay Board Member Jonathan Besa, Chairman on Committee on Appropriations, gintuad sini nga ang nasambit nga supplemental budget ang nagikan sa savings sang kapitolyo sang nanliligad nga tuig kun sa diin P152-M ang halin sa savings sang general fund kag P148-M naman ang naghalin sa 20% sang development fund.
Suno diri, tinutuyo sang pagbalhin sang kapitolyo nga mahatagan sang maayo kag komportable nga serbisyo ang mga pumuluyo kag mangin maligwa ang sentro sang syudad.
Ginabulubanta nga magalab-ot sa mas o menus P1.3 billion ang kantidad sang 3 hectare project kun sa diin P800-M ang magagikan sa probinsyal government.
Ginklaro ni Besa nga ang P800-M nga pondo ang indi pag-utangon kundi pagakuhaon ini sa development fund sa masunod nga duha ka tuig.
Samtang, ang nabilin nga P500-M ang ginapangitaan na sang pamaagi ni Governor Fredenil Castro agud makakuha sang pondo sa nagkalain-lain nga national agencies kag matuman ang handum nga makahatag sang maayo nga pagserbisyo sa mga pumuluyo.
Ginsiling pa sang opisyal, sa bag-o nga ginatukod nga kapitolyo, ululupod na ang tanan nga departamento para sa mas mahupos kag madasig nga proseso.
