ROXAS CITY – Nagpaandam ang alkalde sang syudad nga indi lamang ang supplier nga wala maka-deliver sang materyales para sa proyekto sang gobyerno sang syudad ang ila pagalagson kundi kalakip ang inhenyero nga in-charge sa proyekto nga napaslawan nga mapatuman ini
Ginpahayag ni Mayor Ronnie Dadivas nga mahimo man nga mapasakaan sang panumbungon ang project engineer bangud kasubong nga ginpabayaan sini ang iya obligasyon.
Suno sa alkalde nga madamo nga mga pumuluyo sa Barangay Cagay kag Barra ang naperwisyo bangud sa delayed nga implementasyon sang road concreting project nga tuga sang wala ma-deliver nga materyales sa pihak nga ginbayaran na ang supplier nga Solidus Construction Supply sang gobyerno sang syudad.
Nagpamat-ud pa si Mayor Dadivas nga humalin subong mangin blacklisted na ang nasambit nga supplier kag indi na makapasakup sa mga bidding sang gobyerno sa mga proyekto sa palaabuton.
