Supply sang bugas sang Agosto 2025, nagtaas kun ipaanggid sang nagligad nga tuig

Nagtaas ang supply sang bugas sang Agosto 2025 kun ipaanggid sang nagligad nga tuig sandig sa data sang Philippine Statistics Authority (PSA).

Humalin Agosto 1, may yara sang 2.32 million metric tons nga stocks sang bugas sa diin nagtaas sang 24.5 percent gikan sa 1.86 million metric tons sang nagligad nga 2024.

Apang mas manubo ini kun ipaanggid sang Hulyo nga may 2.79 million metric tons sang bugas. Kadam-an sa pagtaas sang bugas ang halin sa National Food Authority (NFA) warehouses, nga nagsaka sang masobra 200 percent, kag halin sa mga panimalay nga nagtaas man sang 51 percent.

Apang ang mga bugas nga yara sa mga commercial warehouse ang nagnubo sang 11.5 percent.