Ginsigurado sang Philippine Sugar Millers Association (PSMA) nga nagapabilin nga sobra pa sa bastante ang supply sang kalamay sa pungsod sa pihak sang nagapadayon nga krisis sa Middle East nga mahimo magpataas sa gastos sa pagpanguma.
Base sa datos sang Sugar Regulatory Administration (SRA) tubtob Abril 5, naglab-ot sa 677,624 metric tons ang imbentaryo sang raw sugar, nga nagtaas sang 9.59%, samtang yara sa 529,573 metric tons naman ang refined sugar.
Suno sa PSMA, ang mataas nga imbentaryo ang nagaserbe nga buffer agud mapabilin ang mapag-on nga suplay kag malikawan ang gulpi nga paghulag sang presyo sa merkado.
Gindugang pa sang grupo nga bastante ang supply agud maaksyunan ang ginalauman nga pagkinahanglan sang mga kunsumidor kag industriya sa pungsod.
