ROXAS CITY – Posible nga bakbakon na lang ang support column sang arko sa boundary sang Barangay Balijuagan, Roxas City kag Barangay Cudian, Ivisan, Capiz kasunod sang mga aksidente sa dalan sa diin nagakabunggo ang mga motorista.
Sa interview sang Bombo Radyo kay Punong Barangay Ronnel Fernando sang Balijuagan, iya ginpahayag nga una anay nga ginkuha ang arko sa bulig sang Roxas City Engineers Office kag Capiz Electric Cooperative.
Suno kay Fernando, posible magabalik man ang mga natungdan sa Lunes, Oktubre 13, agud mabakbak ang support column.
Nagapangabay kuntani ang Punong Barangay sa Department of Public Works and Highways-Capiz 1st District Engineering Office nga butangan na lang sang barikada sa kilid sang dalan bangud may yara sang apat ka mga panimalay nga yara sa lugar.
Pahayag niya, kadam-an sa mga aksidente ang bangud sa human error apang kuhaon na lang ang arko kag support column agud wala na sang basulon ang mga motorista.
Nagpasalamat man ang Punong Barangay sa City Engineers Office kag CAPELCO sa madasig nga paghatag sang tikang.
