MANILA — Ginmanduan sang Supreme Court ang Kongreso nga magpatigayon sang nagakaigo nga aksyon nga nagadumili sa political dynasties, matapos ginpahayag sang Korte nga ang 39 ka tuig nga pagkapaslawan sang Kongreso sa pagtuman sini nga constitutional mandate sa madugay na nga tinion.
Sa unanimous ruling nga ginsulat ni Associate Justice Ramon Paul Hernando, ginpahayag sang Supreme Court nga may mandatory constitutional duty ang Kongreso nga maghimo sang legal provision batok sa political dynasties, suno sa Article II, Section 26 sang 1987 Constitution.
Gindirektahan sang Korte ang Kongreso nga ipasar ang nagakaigo nga anti-political dynasty law “at the earliest opportunity” kag “with utmost urgency.” Klaro man sang Supreme Court nga ang phrase nga “as may be defined by law” wala nagahatag sa Kongreso sang option kon ipasar ukon indi ang amo nga legal provision, kundi nagahatag ini sa mga mambabatas sang gahum nga magtakda kon ano ang sakop sang political dynasty kag ano nga mga relasyon kag posisyon sa gobyerno ang dapat maapektuhan sang ban.
Suno sa Supreme Court spokesperson nga si Atty. Camille Ting, wala nagtakda sang deadline ang Korte sa Kongreso kag wala man ini nagpatuman sang penalty batok sa mga mambabatas bangud sa 39 ka tuig nga pagkapaslawan sa paghimo sang amo nga balaod. Apang, ginkabig sang Korte nga ang padayon nga pagkapaslawan sang Kongreso sa pagtuman sini nga mandato isa ka grave abuse of discretion kag continuing violation sang constitutional duty.
Ginsiling pa ni Ting nga bisan wala naghatag sang specific deadline ang 1987 Constitution para sa pagpasar sang anti-political dynasty law, indi ini nagakahulugan nga mahimo nga ipalawig sang wala katapusan ang paghimo sini. Gintalakay man sang Korte nga ang political dynasties nagapadayon nga malapnag kag naglapta pa gani sa party-list system.
Samtang, ginpahayag sang House Committee on Suffrage and Electoral Reforms Chairperson Rep. Zia Alonto Adiong nga tumanon sang Kongreso ang iya katungdanan kag padayunon ang proseso sa pag-apruba sang anti-political dynasty law.
Kon indi gihapon mag-aksyon ang Kongreso sa ginmandu sang Supreme Court, suno kay Ting, kinahanglan pa hulaton kon may bag-o nga kaso nga ipasaka sa Korte kag kon ano ang mahimo sini nga aksyon base sa amo nga kaso.
