Ginpahayag ni Supreme Court Associate Justice Antonio Kho Jr. nga oras na agud i-overhaul ang Philippine Health Insurance Corporation (PhilHealth) kalakip ang pag-ilis sang board sini sa tunga sang kapaslawan nga magsunod sa ginamandato sang layi kaangut sa paggamit sang pondo sini.
Ginhimo sang mahistrado ang pahayag sa ikatatlo nga round sang oral argument sa mga petisyon nga nagakuwestiyon sa konstitusyonalidad sang PhilHealth fund transfer sa national treasury.
Diri, ginkwestiyon ni Kho kun paano ginhimo sang PhilHealth ang budget request sini sa General Appropriations Act (GAA) nga dapat magagikan suno diri sa mga koleksyon sang buwis, kalakip ang gikan sa sin taxes kag gaming revenues, suno sa ginamandu sang layi.
Gin-ako ni Department of Health (DOH) Spokesperson Assistant Secretary Albert Domingo nga gina-compute sang PhilHealth ang budget request sini base sa numero sang mga indirect members sa ila nga database kag wala nagbase sa computation sa sin tax allocation.
Bangud sini, ginkwestiyon ni Kho ang PhilHealth kun ginabalewala sini ang mga legal funding sources sini, nga ginsabat naman ni Domingo nga ang mga ginauna lamang sa prinsipiyo sang pagbadyet sang PhilHealth ang mga kinahanglanon nga nakabase sa alokasyon imbes nga magsalig lamang sa mga ginlauman nga kita sang gobyerno.
Ginpanindugan naman ni Kho nga ang self-imposed funding limits sang PhilHelath ang nagpugong sa state insurer nga dalayon nga masabat ang healthcare needs sang mga Pilipino.
Samtang, ginganyat man ni Associate Justice Kho ang PhilHealth nga hinyuon kay Pangulong Ferdinand R. Marcos, Jr. nga ibalik ang P60 billion nga pondo sang PhilHealth nga ginsaylo sa national treasury bilang unprogrammed funds.
Ginpahayag sang mahistrado nga dapat gamiton ang nasambit nga mga pondo agud mapapad pa ang mga benepisyo sang PhilHealth, mapaayo ang mga serbisyo, kag magkuha sang dugang nga mga tinawo agud masabat ang mga kinahanglano sa healthcare sang pungsod.
Nakatalana nga hiwaton ang masunod nga hearing sa Abril 29 kadungan sang ginaluman nga pagdesisyon sang SC sa mangin kapalaran sang kontrobersiyal nga PhilHealth fund transfer.
