MANILA, Philippines – Timing sang ginpahayag nga impeachment trial suno sa Supreme Court of the Philippines ukon “Forthwith”, gintugyan na sa desisyon sang senado.
Ang amo nga resulta sang desisyon sang SC en banc sa petisyon nga nagaagda nga piliton ang Senado nga magtipon dayon bilang impeachment court matapos mabaton ang articles of impeachment batok kay Sara Duterte halin sa House of Representatives.
Ginsiling sang korte nga samtang may klaro nga mga deadline ang Konstitusyon para sa House of Representatives – pareho sang paglakip sang verified complaint sa Order of Business sa sulod sang 10 session days kag pag-refer sini sa komite sa sulod sang tatlo ka session days wala naman ini nagtakda sang eksakto nga petsa para sa Senado sa pagsugod sang trial.
Bisan pa sini, ginpahinumdom sang SC nga kinahanglan malikawan sang Senado ang wala sang hustong rason nga pagpalawig ukon delay agud maprotektahan ang prinsipyo nga ang mga opisyal sang gobyerno dapat accountable sa katawhan.
Base sa separado nga pahayag, ginpahayag ni Marvic Leonen nga dapat kuntani gin-convene dayon sang Senado ang impeachment court kag indi dapat ginbilin lamang ini sa desisyon sang Senate President nga amo si Francis Escudero sang amo nga tion.
Samtang ang nahauna nga articles of impeachment batok kay Duterte ginpadala sang House sa Senado sang Pebrero 5, 2025. Apang ginpili ni Escudero nga hulaton anay ang pagbukas liwat sang sesyon sang Kongreso sa Hunyo antes sugdan ang trial.
Sa padayon nga pagpakig-angot, gin-kuwestyon ni Duterte ang proseso sang impeachment sa SC. Sang Hulyo 2025, ginpaboran siya sang korte kag ginbaliwala ang impeachment, nga ginpamatud-an liwat sang Enero sini nga tuig.
