ROXAS CITY – Gindepensahan sang ginatudlo suspek ang kaugalingon batuk sa alegasyon nga ginhimuslan sini ang barangay kagawad sang kaaganhon nga nagbiya sa ila balay ang live-in partner sang biktima.
Sa exclusive interview sang Bombo Radyo sa suspek nga si alyas Nonoy ginpahayag sini nga wala sang kamatuoran ang akusasyon ni Kagawad Inday nga iya ini ginhimuslan.
Ginpanindugan sini nga indi matawag nga rape ang natabo sa tunga nila sang biktima, bangud pareho nila ini nga gingusto.
Wala man sang kamatuoran suno sa suspek nga iya ginpilit ukon ginpahog si kagawad Inday, bangud matapos nga nagpabatyag ini sang iya presensiya, mismo ang biktima pa ang nagsuhestyon nga sa likod balay lamang sila magkadto agud indi mabatian sang iya mga kabataan nga nagakatulog sa pihak nga hulot ang ila himoon.
Aminado man ang suspek nga kursunada sini si Kagawad gani ginbantayan sini nga makalakat ang live-in partner sang ginang sa diin natabuan nga nalimtan nga masiradhan ang pirtahan rason nga nakasulod ini.
Sang nakasulod na sa balay sang biktima, nakita sini nga bukas ang pirtahan sang hulot ni alyas Inday rason nga iya ini ginsulod kasunod ang pagkablit sa ginang.
Ginpanginwala man sini nga iya gintutukan sang kutsilyo si Kagawad Inday bangud ang bitbit lamang sini amo ang flashlight.
Ginpabugal man sang suspek nga nakita man sini nga nag-enjoy kag kasubong kuntento ang biktima sa ila ginhimo.
Gintuad pa ni alyas Nonoy nga antes ini nagbiya sa balay ni kagawad nagbilin pa ini sa ila nga indi magsugid sa iban sa natabo sa ila.
Samtang gin-ako sang suspek nga matapos ang natabo sa ila sang biktima, nagdiretso ini pauli sa ila balay, agud magpahuway.
Apang ginkakibot sang nag-abot sa ila balay ang ila punong barangay kaupod ang mga pulis matapos ginaalegar ginreklamo sang biktima sang pagpanghimulos.
