PRESIDENT ROXAS, CAPIZ – Ginhilway na sa karsel ang suspek nga nagbuno sa iya tukayo nga iya man kumpare sa Sitio Euscade, Brgy. Badiangon, President Roxas, Capiz.
Suno kay President Roxas PNP Chief PMAJ Alfred De Leon, ginhilway ang suspek nga si Danilo De lugar Ameterbam, 50-anyos bangud nagtakop na ang reglementary period of detention sini.
Matandaan nga ginbuno sang suspek gamit ang siyam ka pulgada nga kutsilyo ang iya tukayo nga si Danilo Saron, 54-anyos matapos ginapahayag may nagluntad nga mainit nga argumento sa tunga sang duha.
Nag-angkon sang pilas sa wala nga dughan ang biktima nga gilayon nga gindala sang pamilya sa ospital nga padayon sa karon nga ginabulong.
Nahibaluan nga yara sa impluwensya sang makahulubog nga ilimnon ang magtimbang nga bahin sang natabo ang insidente nga lunsay mga residente sang nasambit nga lugar.
Suno kay PMAJ De Leon, magapasaka sang kaso ang biktima kun indi pagbayaran sang suspek ang tanan nga gastos sa pagpabulong sa ospital.
