ROXAS CITY – Bantog sa pagpangsaka saka kag pagpangkuha sang underwear sang mga kababainhan sa kabalayan sa isa ka barangay sa banwa sang Panay ang suspek nga una ginreklamo sang pagpanghimulos sang isa ka kagawad sa barangay.
Matapos nabalahuba ang ginhimo nga paghimulos ni Jun Jun kay Kagawad Inday, pila pa ka mga kababainhan ang nagkumpirma nga madamo na nga mga kababainhan ang nabiktima sang suspek.
Iban ang nagreklamo sa ila barangay apang may pila ka mga ginhipsan na lamang ang natabo sa ila bangud nabalaka nga posible balikan sila sang suspek.
Apang gintuad sa Bombo Radyo ni alyas Nene, isa sa ginhurikap sang suspek sa sulod mismo sang ila balay nga kasubong preska pa sa iya paminsaron apisar nga 13 ka tuig na ang nakaligad sang ginsulod ang ila balay ni Jun-Jun samtang nagakatulog.
Ginpahayag sang ginang nga wala sa ila balay ang bana nga kaupod sang suspek nga nag-inum sa punong.
Suno kay Nene nga nabatyagan sini nga may nagahikap sa iya nga paa.
Nagduda ini nga indi ang iya bana ang nagahimo sang paghikap sa iya bangud indi batasan sang bana nga uyatan ang iya paa.
Ginpasiga sini ang flashlight kag nagsentro ang sanag sa nawong sang suspek.
Gilayon nga nagpanginpadlos ang ginang kasunod ang pagdaku sang tingog kag pagpamangkot kay Jun-Jun sa iya pagsulod sa balay nga wala nagpanawag.
Nag-alibi ini nga luyag lamang sini nga ma-estorya ang ginang.
Apang posible sa kahadluk ni Jun Jun sa pamahog sang ginang nga isugid sa iya bana, gilayon ini nga naglakat.
Apang wala ginpalampuwas ni Nene ang natabo kag sa suporta sang bana nagpalab-ot sila sang reklamo sa barangay, sa diin ginpapirma sa kasugtanan si Jun-Jun nga pananglitan nga liwat ini magsulod sa balay ni Nene kag anuman ang matabo sa iya, wala sang anuman nga salabton ang pamilya sang tagreklamo.
