ROXAS CITY- Ginpasakaan na sang kaso nga Anti-Fencing Law ang suspek nga responsable sa pagkawat sang cellphone, cash nga nasulod sa wallet kag isa ka pakete sang sigarilyo sa isa ka kalan-an sa Sitio Lawis, Barangay Baybay, sining syudad.
Pinaagi sa entrapment operation sang mga kapulisan, nadakpan ang suspek nga si Jason Berano sang Barangay Malag-it, Pontevedra, Capiz nga responsable sa pagkawat sa nahinambitan nga mga items sang negosyante nga si Jomar Bartolo sang Barangay Gabuan, Roxas City.
Nahibaluan nga matapos nadiskubrehan ni Bartolo nga nadula ang iya nga pagkabutang, gilayon sini gintawagan ang cellphone sa diin nagsabat ang nagkuha nga si Berano.
Gintanyagan sang biktima ang suspek nga magabayad ini sang P2,500 kabaylo sang cellphone nga iya ginkuha.
Sa pagpati nga makakuwarta na ini, nagpakigkita si Berano kay Bartolo, apang kabaliskaran ang natabo bangud antes pa ang ila pagkit-anay nagpakit-angut na ang biktima sa mga pulis kag natigayon ang entrapment operation.
Samtang sa pagpakig-angut sang Bombo Radyo sa suspek, gintuad sini nga ginpasa lamang sa iya sang duha ka mga kalalakinhan nga nakasuksok sang face mask ang cellphone kag ginhambalon nga kun iya ini mabaligya hatagan man siya sang kuwarta.
