ROXAS CITY – Nagsungka na sa otoridad ang suspek sa pagpatay sa isa ka Senior Citizen nga lalaki nga nasapwan patay sa National Road sang Barangay Taft, Tapaz, Capiz.
Matandaan nga ginkilala ang biktima kay Sergio Robiso 63-anyos kag residente sang Barangay Malitbog sang nasambit nga banwa.
Sa impormasyon nga nakuha sang Bombo Radyo nagikan sa Tapaz Muncipal Police Station, ginkilala ang suspek kay Rinniel Villegas 19-anyos kag residente sang amu nga lugar.
Suno kay Villegas, nga nagahampang ini sang ML sa higad sang Highway apang sang naglabay ang si Robiso hinali na lamang siya sini nga ginpatup-an sang inumol.
Bangud sini, sa iya kakibot nakabalos man sang pagsumbag ang suspek kag naglakat palayo sa lugar, apang sang papauli na kun tani si Villegas ginbatayan ini sang biktima kag didto liwat nga gintapungol ang suspek.
Dugang pa sini nga nakakuha sang kahoy ang suspek kag gingamit sa paglampos sa ulo sang biktima rason sang iya pagkatumba kag pag-angkon sang patal nga pilas sa diin posible gintunaan sang iya kamatayon.
Ginapahayag nga gin-ako ni Villegas sa mga kapulisan nga ini ang may kahimuan sa kamatayon ni Robiso.
Sa karun nagapabilin sa kustodiya sang Tapaz PNP ang nasambit nga biktima kag natalana nga pasakaan sang nagakaigo nga kaso.
