ROXAS CITY – Newly identified ukon wala pa sang rekord nga nagaduso sang iligal nga droga ang suspek nga nakapalagyo sa buy-bust ops nga ginpatigayon sang President Roxas PNP.
Sa interview sang Bombo Radyo kay Pcpt. Alfred De Leon, Chief of Police sang Pres. Roxas MPS, ginsiling sini nga menor de edad pa ang suspetsado nga si Argie Buenafe Abarides sang ginpatigayon ang “Oplan Tokhang” rason nga wala ini sang rekord, apang sa ila pagmonitor sa sulod sang 1 ka bulan, napamutdaan nila nga runner ini sa pagbaligya sang iligal nga droga.
Dugang sini, sa syudad sang Roxas pa ginakuha sang suspetsado ang iya suplay sang iligal nga droga kag ginabaligya ini sa banwa sang President Roxas.
Mahibaluan nga nakapalagyo si Abarides bangud madasig sini nga ginpaandar ang motorsiklo sang dakpon na kuntani sang poseur buyer nga operatiba apang natumba ini kag ginharang sa operatiba ang motorsiklo kag madasig nga nagdalagan.
Ginpahayag pa sang Hepe, nga kasubong nga daw kabayo ang kadasigon sang suspek rason nga wala na nalagas sang operatiba apisar gintinguhaan niya ini nga masundan.
Panugyan naman ni De Leon nga wala gauntat ang Pres. Roxas PNP sa pagtapna sa mga nagaduso sang iligal nga droga, nagpasalig man ini nga madakpan ang suspek sa isakto nga tiyempo.
