ROXAS CITY – Arestado ang 35-anyos nga lalaki nga suspek sa pag pangbuno sa duwa ka mga persona matapos nga serbihan sang warrant of arrest sang kapulisan sa mga kaso nga Frustrated Homicide kag Homicide.
Ginkilala ang arestado kay Ben Cuagon alyas “Ebong” residente sang Sitio Casay, Barangay Agtatacay Sur, Sapian.
Ginrekomendar sang korte ang kantidad nga P120,000 para sa kaso nga Homicide kag P72,000 sa kaso nga Frustrated Homicide bilang piyansa para sa temporaryo nga kahilwayan sang akusado.
Matandaaan nga ginbawian sang kabuhi ang biktima nga si Jurly Evangelio, 38-anyos kag residente man sang nasambit nga lugar. Samtang, pilason naman ang abyan nga si Amor Dela Cruz kag residente sang Brgy. Agsilab matapos nga ginbuno sang arestado ang padulong kuntani nga mga biktima sa Brgy. Agsilab banwa sang Sapian.
Sa karon, nagapabilin nga yara sa kustodiya sang Sapian Municipal Police Station ang arestado para sa nagakaigo nga disposisyon.
