Nagapabilin sa kustodiya sang Maayon Municipal Police Station ang suspek sa pagpangbuno sa iya kaugalingon nga pakaisa sa Barangay Indayagan, Maayon, Capiz.
Ang biktima amo si alyas Edward, kag ang suspek amo si alyas Bob, 55-anyos kag lunsay residente man sang nasambit nga lugar.
Sa interview sang Bombo Radyo kay Police Executive Master Sergeant Rodnie Dordas, Deputy Municipal Executive Senior Police Officer sang Maayon Municipal Police Station, iya ginpahayag nga may nagluntad nga komosyon sa tunga sang duha rason nga naga-agaway ini sang kutsilyo kag nabuno sang suspek ang biktima.
Matapos nga natambagan ang duha, didto nadiskubrehan nga nabilin pa ang hinganiban nga naga-ungot sa wala nga bahin nga porsyon sang likod sang biktima.
Gilayon man nga gindala sa ospital ang biktima para sa nagakaigo nga pagbulong.
Sa subong, nagapabilin sa kustodiya sang mga otoridad ang suspek kag ginahulat pa ang desisyon sang magkatuhay nga bahin kun magapasaka sang kaso ukon indi.
