JAMINDAN, CAPIZ – Nakaaresto na karon sa Jamindan Municipal Police Station ang suspek sa pagbuno-patay sa 26 anyos nga lalaki sa Sitio Nag-uring, Barangay Agambulong, Jamindan, Capiz.
Ang naaresto nga suspek amo si Sonny Focbit samtang ang napatay naman nga biktima ang ginkilala nga si Dennis Orocio sang nasambit nga lugar.
Base sa inisyal nga imbestigasyon sang Jamindan Municipal Police Station nga samtang naga-inom ang biktima kag suspek, hinali na lamang nga nag-angkon sang indi pag-intiendihanay ang duha rason nga ginbuno sang suspek ang biktima.
Nag-angkon naman sang pilas sa tiyan si Orocio nga gilayon naman gindala sa ospital agud madapatan sang nagakaigo nga pagbulong.
Apang, sang ginabulong na ini sa ospital gilayon man ini ginbawian sang kabuhi.
Una nga nagpalagyo ang suspek matapos ang insidente apang sang ulihi matawhay man ini nga nagsungka sa otoridad kag gin-ako ang nasambit nga krimen.
