ROXAS CITY – Nagdangat sa duha ka mga persona ang ginakabig suspek sa pagpatay sa isa ka mister sa Binaylehan sa Sitio Pinay, Barangay Lacaron, banwa sang Dao.
Sa interview sang Bombo Radyo kay Police Staff Sergeant Gavin Gonzales, imbestigador sang Dao MPS, ginkumpirmar sini nga ang ikaduha nga suspek amu si Roland Demonarca, nga kaupod ni SK Chairman John Paul Delfin.
Suno sa imbestigador, manugtapos na ang binayle sang nagapaguwa na sa pertahan ang biktima nga si Richard Baarde, apang ginsundan ini sang mga suspek kag may nagluntad nga pagtapungulay, apang gilayon nga ginbuno sang SK Chairman ang biktima.
Natigayon pa nga makabalik pasulod sang binaylehan si Baarde apang ginlagas ini ni Demonarca kag gintapungol.
Napauntat lang ang kinagamo suno sa pulis, sang nagtambag ang chief tanod sang Brgy. Duyoc, apang madasig nga nagdalagan ang mga suspek sa wala mahibaluan nga direksyon.
Dugang pa diri, nga ang kutsilyo nga gingamit sang SK Chairman ang yara na nga daan sa guwa sang binaylehan, apang wala mahibaluan kun kay sin-o ini nga panag-iya.
Tatlo ka igu tuga sang pagpangbuno ang naangkon nga pilas sang biktima.
Natigayon nga masambit sang biktima ang mga suspek antes ini ginbawian sang kabuhi sa ospital.
Nagaguwa nga daan nga hiligut-anon ang motibo sa krimen.
Posible Murder ang pagaatubangon nga kaso sang duha nga sa karon padayon nga ginaayam sang mga kapulisan.
