ROXAS CITY – Nagakasubo sa karon ang mga residente sang pungsod Japan bangud sa makakilibot nga balita sa pagluthang-patay kay anay Prime Minister Shinzo Abe.
Sa interview sang Bombo Radyo kay Mr. Josel Palma, Bombo International Correspondent sa pungsod Japan, ginpahayag sini nga si Abe ang longest serving prime minister sa nasambit nga pungsod gani tuman nalang ang pagkasubo kag pagkakibot sang pumuluyo matapos ini ginluthang-patay samtang nagahatag sang speech sa kampanya para sa palaabuton nga eleksyon.
Ginkilala ang suspek kay Tetsuya Yamagami, 41- anyos, kag residente sang Nara Region Western Japan kag anay suldado nga nagserbisyo sa maritime self-defense force kun sa diin ginaalegar man nga may deperensya sa paminsaron.
Ginpahayag nga tuman ka strikto ang Japan sa paghupot sang armas rason nga gingamit sang suspetsado ang home-made nga armas-luthang sa pagpatay kay Abe.
Dugang pa ni Palma, ginsiling sang isa ka saksi nga yara sa lugar sang insidente nga una sini nabatian ang isa ka lupok kag nakita si Abe nga naga-atras, sa ikaduha nga lupok nakita nga natumba na kag duguon ang dughan sini kag gilayon man nga gindala sa Medical Evacuation Center.
Ginsakay pa suno diri sa helicopter si Abe padulong sa Nara Medical University Hospital kun sa diin gintinguhaan masalbar apang gindeklarar nga patay lagpas alas 5:00 sang hapon.
Ginsiling ni Palma, wala sang dapat ikaalarma bangud nagaisahanon ang suspek sang nadakpan ini kag si Abe lamang ang gintuyo nga patyon.
Sa karon, yara sa kustodiya sang Nara Nishi Police Station ang suspek kag magapangatubang sa nagaka-igo nga kaso.
