ROXAS CITY – Wala sang rekord sa ila barangay kag malumhing nga klase sang lalaki ang suspek sa natabo nga pagluthang-patay sa isa ka Barangay tanod sa Barangay Sta. Teresa, Dumalag, Capiz.
Ini ang pagkakilala ni Punong Barangay Joey Didal sang Brgy. San Antonio, banwa sang Tapaz, sa amu nga suspek, sang mainterview sang Bombo Radyo.
Suno diri, nakibot man ini sa balita nga si Carl Feñesa, ang ginatudlo suspek sa pagluthang kay Ricardo Fajutar Jr.
Aminado ang kapitan nga tumandok sang banwa sang Pontevedra ang suspek apang taga-San Antonio ang iya sa karon live-in partner.
Masami man sini makita nga nagalakat ang amu nga suspek kag wala man ini sa listahan sang ila BADAC.
Matandaan nga sandig sa impormasyon nagikan sa Dumalag MPS, nga nakabati sang lupok sang armas-luthang ang Brgy. Tanod kag sa iya pagpadulong sa lugar agud tsekyaron, nag-angkon diri sang argumento sa tunga sang grupo sang suspek.
Tubtob nga ginluthang ni Feñesa si Fajutar sang makaduha ka beses sa iya tiyan.
Gintinguhaan pa nga masalbar ang kabuhi sang biktima, apang gindeklarar ini nga dead on arrival sang doktor.
Ginpahayag nga boluntaryo man nga nagsungka ang suspek matapos makumiter ang krimen.
Natalana nga mapasakaan sang panumbungon nga Homicide ang nasambit nga suspek.
