Ginpasakaan sang kaso nga first-degree murder kag murder of foreign officials ang suspek nga si Elias Rodriguez matapos gintiro kag ginpatay ang duha ka Israeli embassy staff sa guwa sang Capital Jewish Museum sa Washington DC.
Suno sa mga otoridad, ginatunaan sang hate crime ang insidente.
Suno sa report, nagguwa sa isa ka event ang duha ka mga biktima nga sanday Yaron Lischinsky kag Sarah Lynn Milgrim nga gintiro ni Rodriguez.
Antes nadakpan, ginaalegar nga nagasinggit ang suspek nga “free Palestine.”
Padayon ang imbestigasyon kag ginalauman ang dugang nga panumbungon batok sa suspek nga magapabilin sa kustodiya sang mga otoridad samtang ginahulat ang iya masunod nga hearing sa korte sa Hunyo 18, 2025.
Samtang, ginkondenar sang mga lideres gikan sa bug-os nga kalibutan ang insidente lakip na ang Israeli Prime Minister Benjamin Netanyahu kag US President Donald Trump, sa diin gintawag ni Netanyahu ang insidente nga isa ka antisemitic attack.
