ROXAS CITY – Nagapabilin nga naka-hospital arrest ang suspek sa pagpangbuno-patay sa isa ka truck driver sa Barangay Old Guia, Maayon, Capiz.
Mahibaluan nga ginkilala ang biktima kay John Alborte, 44-anyos, samtang ang ginapahayag nga suspek amu si Gerald Agapito, 34-anyos, lunsay mga residente sang nasambit nga banwa.
Matandaan nga sa impormasyon nga nagikan sa Maayon Municipal Police Station, ginapahayag nga magkaupod nga naga-inom-inom sang makahulubog nga ilimnon ang biktima kag suspek sa balay ni alyas Dodoy, apang may natabo nga mainit nga pagbinaisay sa tunga sang duha.
Bangud sini, ginbuno sang suspek ang biktima nga naigo sa tuo nga bahin sang iya tiyan.
Madasig naman nga gindala ang biktima sang iya himata sa Bailan District Hospital para sa nagakaigo nga pagbulong.
Apang, ginkumpirmar sang Maayon PNP nga ginbawian sang kabuhi ang biktima samtang ginabulong sa ospital kag yara na sa karon ang bangkay sini sa isa ka punerarya sa nasambitan nga banwa.
Natalana naman nga pasakaan sang kaso nga murder homicide ang nasambit nga suspetsado.
