ROXAS CITY – Tuman ang paghinulsul nga nabatyagan sang suspek nga nagpangbuno sa kaugalingon sini nga amay kag manghod sa Barangay Bito-on Ilawod, Cuartero Capiz takna 1:35 sang hapon kahapon Oktobre 2, 2023.
Mahibaluan ginkilala ang mga biktima nga sanday Jorie Sibog 24-anyos kag Ruben Sibog 53-anyos samtang ang ginapahayag suspek amu si Joven Sibog 30-anyos nga lunsay residente sang nasambit nga lugar.
Sa interview sang Bombo Radyo kay PMaj. Christian P. Mahometano hepe sang Cuarteo Municipal Police Station, ginpahayag sini nga sa ila pagpangusisa sa suspek daan nga hiligut-anun ang nagtulod sa iya agud himuon ang amu nga krimen.
Ginpahayag man suno diri sang suspek nga daw kaangay masami gina-apinan sang amay ang iya manghod kag siya ang nagaguha nga malain sa panulukan sini, rason nga amu na lamang ang iya pagkalain sang buot.
Bangud yara sa impluwensya sang makahulubog nga ilimnon, nagpalangdulum suno diri ang iya panulukan kag aksidente nga ginpangbuno ang iya amay kag manghod.
Matandaan nga nag-angkon sang pilas sa magkatuhay nga parte sang lawas sanday Jorie kag Ruben nga madasig naman ginpadangat sa pinakamalapit nga ospital agud dapatan sang nagakaigo nga pagbulong.
Apang takna 1:35 sang hapon kahapon sang ginabawian sang kabuhi ang amay samtang ginabulong sa ospital.
Angut sini, desidido ang kaugalingon nga pamilya sang suspek nga magpasaka sang nagakaigo nga kaso batuk sa iya.
Samtang, matalunsay naman suno diri nga nagsungka sa kapulisan si Joven kag sa karun yara na sa kustodiya sang Cuartero MPS kag ginapreparar na ang mga nagakaigo nga dokumento para sa pagpasaka sang kaso angut sa insidente.
