ROXAS CITY – Nakapalagyo kag indi pa matumod ang ginapanaguan ni Mark Cortado Uy, suspek sa asud-asod nga pagpangholdap kag pagmotornap, sa syudad sang Roxas.
Sa interview sang Bombo Radyo kay Wennie Cortado, utod sa Iloy sang suspek, gintinguhaan sini nga tawgan ang iya utod apang ginpahayag diri nga yara na ini sa malayo nga lugar.
Pagklaro ni Cortado nga wala sini mahibaluan sa una, ang iligal nga ginahimo sang iya utod sa Iloy, apang nakahibalo ini nga ex-convict ang iya half-brother.
Nagduda ini nga nagbalik sa iligal nga bulohaton, sang nagpauli nga basa kag mahigko sa tunga sang kagab-ihon si Uy.
Gin-aku man ni Cortado nga may armas-luthang nga ginahuptan ang suspek kag nagpalupok sang tion nga nakapalagyo matapos ang pagpangholdap.
Gindugang pa ni Cortado nga may kaupod nga ‘abyan’ si Uy nga nakit-an sini nga may pilas sa dughan lapos sa likod.
Panugyan ni Cortado sa iya utod, untatan na ang ginahimo sini nga indi maayo kag magsungka nalang sa kapulisan agud maibanan ang pagaatubangon nga kaso.
