Suspek sa pagpanglabo-patay sa mangunguma sa banwa sang Tapaz, natalana nga pasakaan sang kaso nga Homicide

ROXAS CITY – Natalana nga pasakaan sang kaso nga Homicide ang suspek sa pagpanglabo-patay sa isa ka 70-anyos nga mangunguma sa Barangay Mabini, banwa sang Tapaz.

Mahibaluan nga ginkilala ang biktima kay alyas “Dolfo” samtang ang suspek amu si alyas “Rigor” 30-anyos lunsay mga residente sang nasambit nga lugar.

Matandaan nga dead on arrival sa ospital ang biktima, matapos nag-angkon sang patal nga pilas sa ulo, liog kag tiyan tuga sang pagpanglabo.

Ginapahayag nga bangud sa mainit nga pagkomprontohanay angut sa nitso sang utod sang suspek nga nadala sa sunog sang nag-kaingin ang biktima ang gintunaan sang krimen.

Sa karun padayon pa nga gina-ayam sang Tapaz Municipal Police Station si alyas “Rigor” agud mapanabat sa nakomiter nga krimen.