SAPIAN, CAPIZ – Boluntaryo nga nagsungka sa katapo sang Sapian Municipal Police Station ang suspek sa pagpanglabo sa isa ka lalaki sa Barangay Dapdapan, Sapian, Capiz.
Matandaan nga ginkilala ang biktima kay alyas “Rebo”, 27-anyos, caretaker sang punong kag residente sang banwa sang Concepcion, Iloilo, samtang ang ginatudlo nga suspek ang ginkilala kay alyas “Ting-Ting”, 56-anyos, caretaker man sang punong kag residente naman sang Barangay Majanlud, sa amo nga banwa.
Sa interview sang Bombo Radyo kay Police Master Sergeant Louie Banate, imbestigador sang Sapian PNP, natabo ang insidente sang tion nga mapauli na kuntani ang biktima sa iya sini ginadayunan nga payag sa punong kag nalabayan sini ang suspek kun sa diin ginapahayag nga nagpamangkot ang biktima sa suspek kun ang hinuptanan sini nga manok ang ginabaligya apang lain ang paghangop sang suspek kag nagresulta sa mainit nga komosyon sa magtimbang nga bahin.
Bangud sa komosyon , nagresulta ini sa pagpanglabo sang suspek sa biktima nga nag-angkon sang pilas sa likod kag ulo nga gilayon naman nga ginpadangat sa Mambusao District Hospital para sa nagakaigo nga pagbulong nga yara na karon sa istable nga kondisyon.
Nahibaluan nga yara sa impluwensya sang makahulubog nga ilimnon ang biktima sang natabo ang nasambit nga insidente.
Sa karon, ginahulat nalang sang kapulisan ang desisyon sang biktima kun mapasaka ini sang panunbungon batuk sa suspek.
