Napasakaan na sang kaso ang suspek nga umagad sang biktima nga senior citizen nga ginlabo sa Barangay Poblacion Tacas, Cuartero, Capiz.
Matandaan nga ginkilala ang biktima nga si alyas Clarit, 78-anyos, samtang ang ginapahayag nga suspek amu si alyas Itik, 42-anyos nga lunsay mga residente sa nasambit nga lugar.
Sa interview sa Bombo Radyo kay PCPT Alladen Talaban, Office in Charge sang Cuartero MPS, ginpahayag nga tungod sa daan nga hiligut-anon parte sa duta ang kabangadanan sang pagpanglabo sang suspek sa nasambit nga senior citizen.
Dugang pa sini, sandig sa ila imbestigasyon, ginapahayag nga may natabo nga pagbinaisay sa magtimbang nga bahin bangud sa pagsita sang biktima sa mga kabataan sang suspek tubtob nga nag-abot na sa punto nga ginlabo sang suspek ang biktima.
Bangud sa natabo, nag-angkon sang pilas sa magkatuhay nga parte sang lawas ang biktima tuga sang pagpanglabo nga gilayon naman ginpadangat sa Dao District Hospital para sa nagakaigo nga pagbulong kag yara na sa karon sa istable nga kondisyon.
Narekober naman sa ginluntaran sang insidente ang binangon ukon bolo nga gingamit sa pagpanglabo.
Sa karon, napasakaan na sang nagakaigo nga panumbungon ang nasambit nga suspek kag nagapabilin sa karsel sang Cuartero MPS.
