Napasakaan na sang kaso ang isa ka delivery rider matapos lab-on ang kaangay niya nga rider sa sulod sang isa ka warehouse sa Calipayan Street, Brgy. Punta Tabuc, Roxas City.
Ang biktima amo si alyas Tonio, 27-anyos, residente sang Brgy. Poblacion, Sapian, Capiz, samtang ang suspetsado amo si Mel, yara sa legal nga pang-edaron kag residente sang Brgy. Linateran, Panay, Capiz.
Sa interview sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas Component City Police Station, iya ginpahayag nga nag-umpisa ang insidente sa mainit nga komosyon kag pagsinabtanay sang duha may kaangtanan sa isa ka parcel.
Sa tunga sang ila komprontasyon, ginpahayag nga nagtinguha ang biktima nga sakiton ang suspek, gani nagkuha ang suspek sang kutsilyo nga yara sa sulod sang iya delivery truck agud depensahan ang iya kaugalingon.
Ginhingabot sini ang biktima sa sulod sang warehouse kag ginlabo sa likod kag nagdalagan.
Gilayon naman nga gindala sa ospital ang biktima para sa nagakaigo nga pagbulong.
Sa subong, nakahunong ang suspek sa Roxas Component City Police Station para sa nagakaigo nga disposisyon.
