Ginkumpirmar sang Roxas Component City Police Station nga may yara sang mga kaso ang suspek sa pagpatay kay Police Captain Rian Ampoyos, sa sulod sang isa ka KTV bar sa Barangay Binuntucan, Pontevedra, Capiz.
Ang biktima amo si Police Captain Rian Ampoyos, 48 anyos kag residente sang Barangay Swa, President Roxas, Capiz.
Ang ginatudlo nga suspek amo si William Deocampo, 38 anyos kag residente sang Barangay Jolongajog, Pontevedra, Capiz.
Sa interview sang Bombo Radyo kay Police Lieutenant Colonel Tomagtang, hepe sang Roxas Component City Police Station, iya ginpahayag nga may record ang suspek sang kaso nga robbery with frustrated homicide sang tuig 2024.
Suno kay Tomagtang, may mga nauna man ini nga kaso nga grave threats kag pagpanghold-up sa nagkalain-lain nga banwa sa probinsya sang Capiz.
Sa subong, ginapreparar na sang mga awtoridad ang pagpasaka sang mga kaso batok sa ginatudlo nga suspek kag sa kaupod sini n nakapalagyo pagkatapos sang insidente.
