BOMBO ROXAS – Ginhilway na sa karsel sang Roxas City Police Station ang 43 anyos nga tricycle driver nga nagluthang sa kapareho man sini nga driver sa New Road, Barangay Banica, Roxas City.
Matandaan nga ginpasakaan sang panumbungon nga Frustrated Homicide si Buenvenido “Alyas Palitong” Genoves kag residente man sang nasambit nga lugar matapos ginluthang sini si July “alyas Jutay” Arostique, 45 anyos kag residente sang Barangay Milibili sining syudad.
Ginkumpirmar ni Police Lieutenant Colonel Ricardo Jomuad Jr., Chief of Police sang Roxas City Police Station nga ginhilway na si Genoves matapos nagpaguha sang release order ang City Prosecutors Office bangud man sa kakulangan sang dokyumento partikular ang medical certificate sang nasambit nga biktima. Samtang, padayon sa gihapon nga ginadapatan sang pagbulong ang biktima matapos makaangkon sang igo sang luthang sa tangkugo kag kili-kili.
Matandaan nga nagguha sa imbestigasyon sang mga kapulisan nga away sa trapiko ang gintunaan sang nasambit nga pagpangluthang.
Sa interview sang Bombo Radyo Roxas sa isa ka nakasaksi nga nagbinaisay ang duha ka mga nasambit nga persona sakay ang ila ginamaneho nga tricycle tubtob nga nagbunot sang screw driver ang biktima kun sa diin madasig man nga nagbunot ang suspek sang ginapatihan calibre .38 nga armas luthang.
Ginaalegar nga nakalikaw ang biktima sang tion nga gintiro ini sa parte sang ulo. May yara man sang nagpatunga nga tapungulay sa duha ka mga persona nga nakuhaan sang suspek sang rason agud luthangon ini sa ikaduha nga beses.
Sa interview sang Bombo News Team kay Genoves, hugot man sini nga ginpanginwala nga may kaangtanan ini sa nagluntad nga insidente.
Suno diri nga wala ini makahibalo kun sin-o ang nagluthang sa biktima.
Gindugang pa sini nga nagpalagyo ini sang tion nga nagluntad ang insidente bangud nagakahangawa ini nga madalahig ang mga kabataan nga sakay sang tricycle sini apang indi buot silingon nga ini na ang nagluthang.
