ROXAS CITY – Nakaaresto na karon ang suspek sa pagpangtiro sa isa ka mangunguma sa Barangay Linampongan, Pontevedra, Capiz.
Nakahunong na sa karsel sang Pontevedra Municipal Police Station ang suspek nga si Bonifacio Delos Reyes, 50 anyos sang Barangay Cogon, Panitan kag natalana nga pasakaan sang panumbungon nga Attempted Homicide.
Mahibaluan nga ang nasambit nga suspek ang yara sa likod sang pagpangluthang sa biktima nga si Roberto Dileo, 53 anyos sang Barangay Bailan apang temporaryo nga nagatenir sa Barangay Linampongan sa kampo nga ginapabantayan sang iya nga amo.
Base sa inisyal nga imbestigasyon sang Pontevedra Municipal Police Station, nagapahuway ang biktima kag nagahilay-hilay sang hinali na lamang may nagpundo nga tricycle sa iya atubangan nga ginamaneho sang suspek.
Diri kag ginaalegar nag-gabot sang armas-luthang ang suspek kag gintiro siya sang makaduha ka beses.
Madasig nga nakakuob ang biktima rason nga sa natuo nga kamot lamang ini napilasan.
Nagpalagyo pa ang suspek apang gilayon man ini nga naaresto matapos nga nakilan-an ini sang biktima.
Gilayon nga ginpadangat sa Bailan District Hospital ang biktima agud madapatan sang nagakaigo nga pagbulong.
Ginapahayag nga may yara na sang daan nga hiligut-anon ang duha antes natabo ang insidente.
