Nagapabilin nga at large ang suspek nga nagpatay sa isa ka negosyante sa Barangay Bitoon Ilaya, Cuartero, Capiz.
Ang biktima amo si alyas Ron, 57 anyos, kag residente sang nasambit nga lugar.
Samtang ang suspek naman amo si alyas Rem, 65 anyos, residente man sang nasambit nga barangay.
Sa interview sang Bombo Radyo kay Police Captain Jesse Lepaña, Officer-in-charge sang Cuartero Municipal Police Station, iya ginpahayag nga daan nga hiligut-anon ang rason sang suspek sa pagpangluthang sa Biktima.
Suno kay Lepaña, base man sa ila nga pagpang-usisa ginpablotter na anay sadto sang suspek ang biktima kon sa diin ginpamangdan ini nga nagpamatay sang iya hinuptanan nga itik.
Nahibaluan nga masakay na kuntani sa iya nga tricycle ang biktima sang hinali siya nga ginpalapitan sang suspek kag gintiro sang isa ka bes sa iya abaga.
Bangud sini, natumba ang biktima apang gin-atake pa gid ini sang suspek gamit ang kutsilyo kag gin-gulgol ang liog antes magpalagyo sa wala pa mahibaluan nga direksyon.
Gindala pa sa ospital ang biktima apang gindeklara nga dead on arrival.
Sa subong, padayon ang imbestigasyon sang mga kapulisan agud gilayon nga madakpan ang suspek sa nasambit nga pagpangluthang.
