ROXAS CITY – Natalana nga pasakaan sang kaso nga homicide buwas nga adlaw ang suspek sa pagpatay sa soltero nga nasapwan sa Sitio Dulunan, Barangay Mongpong sini nga syudad.
Ini ang ginkumpirmar ni PLt.Col Aron Palomo, hepe sang Roxas Component City Police Station sang mainterview sang Bombo Radyo.
Matandaan nga, patay na sang masapwan si Wilfredo “Lagtok” de Domingo kag may pilas sa nawala nga dughan tuga sang pagpangbuno.
Pahayag ni Palomo, nga posible natabangan pa ang biktima kun gilayon nga nadapatan sang pagbulong apang maga-aga na ini nakit-an.
Nagaguwa sa imbestigasyon sang kapulisan, nga primary suspect si Jascha Tiu Mangalindan kag wala naman sang direct involvement ang duha ka menor de edad nga kaupod man sang suspek.
Suno kay Palomo, na-provoke ang suspek nga maghimo sang krimen bangud nauna diri, ginhapok sang botelya ni de Domingo si Mangalindan samtang sakay sa motorsiklo kaupod ang duha ka menor de edad kag pauli na kuntani sa ila balay.
Bangud sa natabo, ginkaakig sang suspek ang ginbuhat ni de Domingo kag nagpauli sa ila puluy-an kag nagbalik dala ang kutsilyo.
Gintuad man sang hepe, nga lunsay yara sa makahulubog nga ilimnon ang apat sang natabo ang insidente.
Sa karon, nagapabilin sa kustodiya sang Roxas City PNP ang suspek para sa nagakaigo nga disposisyon.
