ROXAS CITY – Indi mapatawad kag luyag ipakulong sang asawa sang suspek ang iya bana matapos nga napabusong sini ang iya hinablos kag nagpalagyo sa Manila.
Sa interview san Bombo Radyo kay Nanay Mary Ann, tuman ang kasakit nga nabatyagan sini bangud wala ini nagalaum nga mahimo sang iya asawa nga tuntuhon siya kag kaugalingon pa sini nga hinablos ang ginpabusong.
Sa panaysayon sini, naglaong ang iya bana nga mapadulong sa Barangay Vizcaya agud mag-ubra, kun sa din gindul-ong pa ini sang subang nga bata apang, nag-abot na ang hapon wala gihapon ini nakapauli kag sa pagtsekyar wala man nagpadulong sa iya gina-ubrahan.
Matandaan nga ginreport nga missing ang dalagita matapos nga wala makapauli sang nagkuha ini sang module sa eskwelahan, kadungan sang pagkadula man sang suspek nga si Edward Langurayan kag natukiban lamang nga upod ang duha sang nagtawag ang menor de edad sa iya pamilya kag nagpangayo sang pasaylo sa iya ginhimo.Natigayon nga makapauli ang dalagita kag gintuad nga apat na ka bulan ini nga nagabusong kag ang ginatudlo nga amay amu ang suspek.
Suno kay Mary Ann, sa sulod sang 25 ka tuig nila nga pag-updanay ni Langurayan bilang mag-asawa, maayo ang ginpakita sini kag pagtratar sa iya rason nga nakibot ini kun nga’a nahimo sang iya asawa nga tuntuhon siya.
Indi ini makapati nga may kamala-malahan nga ginhimo ang iya asawa kag hinablos pa niya ang ginpahilabtan sini.
Dugang pa ni Mary Ann, paga-suportahan sini ang desisyon sang pamilya sang menor de edad kun magapasaka ang mga ini sang kaso batuk sa suspek.
