ROXAS CITY -Nagapadayon ang ginakasa nga hot-pursuit operation sang Pilar Municipal Police Station sa mangingisda nga nagtiro patay sa kapareho sini nga mangingisda sa Barangay Natividad Pilar Capiz.
Base sa pahayag sang hepe sang Pilar Municipal Police Station nga si Police Captain Alfred De Leon sandig sa ginpahayag sa mga kapulisan sang tiayon sang suspek nga si Rodrigo Flores, 44 anyos sang Barangay Guinticgan, Carles, Iloilo nga tatlo na ini ka adlaw nga naga ugtas sa mga nagakalawasak sini nga timing sa kasag.
Suno pa sa tiayon nga ginasalakay sang mga baruto sang pila ka mga mangingisda ang ginpamutang sini nga mga timing sang bana.
Wala naman sang ihibalo ang tiayon kun sa diin nagpalagyo ang bana sini.
Matandaan nga base sa inisyal nga imbestigasyon sang Pilar Municipal Police Station nga yara sa tunga sang kalalawran ang biktima nga si Rommel Francisco 26-anyos kaupod si Sonny Garcia, 50 anyos lunsay mga residente sang nasambit nga lugar sang hinali na lamang nagpalapit sa ila si Flores nga sakay man sa isa ka baruto.
Sa ila kakibot, ginpaguwa sang suspek ang iya armas-luthang kag gintiro si Francisco nga naigu sa malapit sa iya nga abaga.
Gintuyo man nga tiruhon sang suspek si Garcia apang nakalumpat ini sa ila ginasakyan nga baruto.
Gindala pa sa ospital si Francisco apang gindeklarar ini nga dead on arriva.
