ROXAS CITY – Ginapanindugan sang nadakpan nga suspek sa serye sang motornapping sa syudad sang Roxas nga nagaisahanon lamang ini sa pagpangawat sang motorsiklo kag wala sang kaupod.
Sa exclusive interview sang Bombo Radyo kay Alexander Martinez, ginpahayag sini nga wala ini sang kakunsabo sang nagpangmotornap kag nagbaligya sang ginkawatan nga motorsiklo.
Suno diri nga siya ang nagakawat kag siya man ang nagatransaksyon sa pagbaligya sang mga motorsiklo.
Aminado ini nga indi siya tumandok sang Roxas City bangud taga Moriones Tondo, Manila ini.
Apang sang nagkakilala sila sa FB sang iya live-in partner, nagdesisyon sila nga mag-upod kag nagtenir sa Roxas City sa sulod sang isa ka tuig.
Gin-ako ni Martinez nga bangud wala sang trabaho nakapanumdum ini nga magpangmotornap agud may mapakaon sa pamilya.
Nagsugod sa iligal nga buluhaton si Martinez sang bulan sang Pebrero kag may anum na ini nga mga motorsiklo nga ginkawat kag narekober sang kapulisan.
Kalakip diri ang pinakaulihi nga motorsiklo nga na-intercept sang otoridad nga ginasakyan sang ugangan ni Martinez nga ginaalegar ginmotornap man.
Gintuad sini nga natun-an lamang niya sa FB kun paano magpaandar sang motorsiklo nga wala sang llabe.
Apang ang mga motor nga iya ma-motornap suno kay Martinez, ang mga motorsiklo nga wala na-lock sang tag-iya.
Naghinyo man ini sa mga kapulisan nga hilwayon na si Justin Brillo, bangud wala ini sang sala.
Nagpangayo man sang kapatawaran si Martinez sa tanan nga iya naagrabyo kag handa nga atubangon ang mga kaso nga ipasaka sa iya.
Samtang ginapanindugan sini nga wala sang ihibalo ang iya nga live-in partner sa iya nga ginahimo kalakip ang pamilya sini.
