JAMINDAN, CAPIZ – Boluntaryo nga nagsungka sa Punong Barangay sang Barangay San Jose, Jamindan, Capiz ang suspek sa nagluntad nga shooting incident sa Barangay Sto. Rosario sa amo nga banwa.
Mahibaluan nga duha ang napilasan sa amo nga insidente kun sa diin ang mga biktima ang ginkilala nga sanday Milagros Casabon, 70 anyos kag Rosemarie Gardose, 35 anyos lunsay mga residente sang Barangay Sto. Rosario, Jamindan.
Suno kay Police Captain Peter John Pisueña, hepe sang Jamindan Municipal Police Station, base sa ila nga imbestigasyon, nagbaisay ang suspek nga si Alden Gardose, 40-anyos kag Romel Gardose tubtob sa gintayaan ni Alden sang armas-luthang nga 12 gauge homemade shotgun si Romel.
Ginapahayag nga wala kuntani sang plano si Alden nga luthangon si Romel apang sa ila pagpukutay, aksidente nga napitik ang gatilyo sang armas-luthang rason nga naigu ang duha ka mga biktima.
Bangud sa pagtambag sang duha ka mga biktima, naigo sa ulo si Casabon samtang pilas naman sa natuo nga butkon kag abaga ang naangkon ni Gardose.
Sa karon padayon nga ginabulong sa West Visayas Medical Center si Casabon samtang nakaguwa naman sa ospital si Gardose.
