ROXAS CITY – Nagpaathag ang chairman sang Committee on Laws and Good Governance sang Sangguniang Panlungsod sang siyudad sang Roxas natuhoy sa ila nangin desisyon sa ginpasaka nga administrative case batuk kay Punong Barangay Einstein Okpora sang Barangay Inzo Arnaldo, sining siyudad.
Matandaan nga ginpaboran sang konseho sang siyudad ang reklamo batuk kay Okpora nga nagresulta sa ila pagpapanaog sang duha ka bulan nga suspension order batuk sa nasambit nga opisyal.
Suno kay City Councilor Albert Gregore Potato, nag-agi sa ‘due process’ ang nangin desisyon sang nasambit nga komitiba.
Ginpahayag sini nga Setyembre 2019 sang ila nabaton ang reklamo batuk kay Okpora kag nag-agi ini sa maid-id nga proseso.
Suno diri nga madugay nga binulan nila nga gintun-an ang nasambit nga reklamo tubtob sa nakahimo sila sang desisyon.
Suno diri nga nasaad sa reklamo batuk kay Okpora ang Grave Misconduct, Dishonesty kag alegasyon sang Graft and Corruption apang naguwa sa ila nga desisyon nga ‘Simple Misconduct’ ang nangin liability ni Okpora nga nagresulta sa duha ka bulan sini nga suspensiyon.
Ginpahayag naman ni Potato nga mahimo nga magsumiter sang iya nga ‘notice of appeal’ sa Sangguniang Panlalawigan (SP) si Okpora sa sulod sang 30 diyas samtang nagapadayon ang suspensiyon nga ginpapanaog batuk sa iya.
Ginpahayag naman ni Potato nga indi sang ensakto ang ginpahayag ni Okpora nga ‘political persecution’ ang natabo sa iya bangud anak ni City Vice Mayor Erwin Sicad ang 1st Barangay Kagawad sang nasambit nga barangay nga amo ang magatal-os sa iya sa pwesto kag Barangay Kagawad man sang amo nga lugar ang iloy ni City Councilor Paul Ivan Baticados.
Suno kay Potato nga nag-serbi lamang nga presiding officer sang Sanggunian si Sicad kag wala ini sang partisipasyon sa pagbinotohay sang mga miyembro sang konseho.
Gintawag man ni Potato nga ‘unfair’ ang pahayag ni Okpora nga ‘bias’ sila sa konseho bangud kuntani sang una pa lamang, nag-file na si Okpora sang ‘motion for inhibition’ batuk kay Baticados kag dapat niya nga pamatud-an ang iya mga alegasyon batuk sa isa ka miyembro sang konseho.
Matandaan nga nag-ugat ang reklamo batuk kay Okpora bangud sa ginaalegar pagpasilabot sini sa pondo sang Sangguniang Kabataan (SK) sang ila nga barangay.
Ginapahayag nga gingamit ni Okpora ang nasambit nga pondo nga wala sang pahanugot sa SK sang Barangay Inzo Arnaldo.
