Nagapabilin sa kustodiya ang volunteer driver sang National Bureau of Investigation nga ginatudlo nga may kahilabtanan sa insidente sang pagpinalupok sa Senado. Ang suspetsado nga ginkilala nga si Mel Oragon ang gin-aresto matapos ang insidente sang Mayo 13 nga nagresulta sang pagkataranta sa sulod sang Senate premises.
Suno kay NBI Director Melvin Matibag, indi opisyal nga empleyado sang NBI si Oragon kundi isa lamang ka volunteer nga naga-serbe bilang driver sang grupo nga ginpadala sa Senado. Ginpahayag niya nga gin-validate na sang ahensya ang ila records kag wala nalista ang suspetsado bilang regular nga empleyado.
Base sa inisyal nga imbestigasyon sang kapulisan, ginapatihan nga nagpinalupok sang pila ka beses ang suspetsado sa sulod sang GSIS compound sa Senado nga nagdul-ong sang alarma sa mga tawo sa lugar. Dayon siya nga napunggan kag naaresto sang Senate Security Detachment.
Padayon naman nga ginaiimbestigahan sang mga otoridad ang motibo kag iban pa nga detalye may kaangtanan sa insidente samtang ginahulat ang resulta sang dugang nga forensic kag CCTV analysis.
