Swa-C sa banwa sang President Roxas, ginpaidalum sa total lockdown bangud sa pagtaas sang kaso sang COVID-19

Ginpaidalum sa total lockdown epektibo las 4 kaina sang kaaganhon ang Swa-C sa banwa sang President Roxas.

Ginpahayag ni Mayor Receliste ‘’Tanoy’’ Escolin nga ginpaidalum sa total lockdown ang area bangud sa pagdugang sang 14 ka active cases sa lugar.

Suno sa alkalde nga ginsiguro lamang sini nga ma-contain kag indi na maglapta ang COVID-19 sa iban nga lugar sa ila nga banwa.

Ginkumpirma man sang opisyal ang pagrequest sang augmentation kay Police Col. Julio Gustilo Jr., kag sa Philippine Army agud makordon ang Swa-C kag indi makaguha ang kapin sa isa ka libo nga mga indibidwal nga yara sa lugar.

Nahibaluan nga nakabaton sang impormasyon ang alkalde gikan sa mga residente sa kaingud sang Swa-C nga pila ka mga residente ang nagahingalit nga makaguha kag makapamakal sang ila kinahanglanon.

Handa na ang mga food packs nga igapanagtag sa mga pumuluyo sa Swa-C kag bastante ini tobtob sa duha ka semana.

Ginpasalamatan man ni Mayor Escolin sanday Governor Esteban Evan Contreras II kag Capiz 1^st District Congressman Emmanuel ‘’Tawi’ Billones bangud sa ginpasalig nga bulig sa ila banwa.