ROXAS CITY – Posible nga madamo sang nabal-an nga mga stratehiya ang mga Russian Hackers nga ginamit agud ma-hack kag masulod sang mga ini ang mga systems kag software ukon mga devices sang mga government agencies kag magkatuhay nga mga kumpaniya sa Estados Unidos.
Ini ang ginpahayag ni Mr. Rommel Sario, IT Faculty/Sytem Analyst sang Filamer Christian University kag IT Consultant sang Roxas City Government sang mainterview sang Bombo Radyo.
Suno kay Sario nga na-detect sang mga hackers ang system ukon software sang SolarWinds Orion software vulnerability rason nga madasig nila nakuha ang mga importante nga mga impormasyon, sistema kag techniques.
Ginpahayag man sini nga isa ang pungsod Russia sa may pinakamadamo nga mga hackers nga naga-manipulate sa mga systems sang nagkalain-lain nga mga pungsod ukon nagapatigayon sang cyber attack.
Ini bangud sarang nila ini makwartahan sa tion nga ma-detect nila ang mga privacy data sang magkatuhay nga mga systems ukon software.
Dugang pa sini nga indi man mabudlayan ang mga hackers sa tion nga nakasulod ukon na-hack na nila ang isa ka software ukon system nga sarang nila makuhaan sang mga data.
Mahibaluan nga ginapaalerto na subong sang Department of Homeland Security (DHS) cyber arm ang nagkalain-lain nga mga government agencies sa US matapos nga atakihon sila sang mga hacker kun sa diin 80 porsyento diri ang nabiktima.
