Ginpasakaan na sang panumbungon ang tag-iya kag kahero nga nadakpan sa ginsalakay sang mga otoridad nga KTV Bar sa Barangay Poblacion Ilawod, Pontevedra, Capiz sang damlag lang.
Sa interview sang Bombo Radyo kay Police Captain Gary Diaz, hepe sang Pontevedra Municipal Police Station, ginpahayag nga kaso sa paglapas sa Republic Act 9208 ukon ang Anti-Trafficking in Person Act ang ginapangatubang sang duha ka wala na ginpanghingadlan nga mga persona.
Madumduman nga gin-aresto ang mga suspek matapos nga na-rescue ang pito (7) ka mga babaye nga nagatrabaho sa nasambit nga KTV Bar.
Nahibaluan nga ang Women and Children Protection Center-Visayas Field Unit (WCPC-VFU) ang nagpanguna sa operasyon kag amo man ang nagpasaka sang panumbungon sa mga suspek.
Nagapabilin sa karon sa kustodiya sang Pontevedra Municipal Police Station ang mga suspek samtang yara naman sa paghinakop sang Crisis Center kag MSWDO sang banwa ang mga na-rescue nga mga kababainhan
