ROXAS CITY, CAPIZ – Nakilala na ang tag-iya sang bag nga nabilin sa Roxas Airport nga naghatag sang kakugmat sa mga pasahero kag personnel sang damlag lang.
Sa interview sang Bombo Radyo Roxas kay Police Lieutenant Jose Dexter Paulin, Officer-in-Charge sang Roxas Airport Police Station, iya ginpahayag nga isa ka menor de edad ang nagapanag-iya sang bag nga nabilin sa airport.
Suno kay Paulin, nalipatan sang tag-iya ang bag sang gindul-ong sini ang iya classmate sa airport nga padulong sa Manila.
Dugang pa sang natungdan nga nabalik na ang amo nga bag matapos nga gin-claim sang tag-iya sa ila talatapan.
Bangud sa amo nga hitabo, nagpahanumdom si Lt. Paulin sa publiko, ilabi na sa mga biyahero, nga indi pagpabay-an ang ila nga mga gamit sa pampubliko nga lugar, ilabi na sa mga matawo nga lugar pareho sang airport agud indi makatuga sang kakugmat sa publiko.
Ginpasiguro man sang natungdan nga padayon ang hugot nga pagbantay kag pagpatuman sang mga seguridad sa Roxas Airport agud masiguro ang kaluwasan sang mga pasahero kag personnel.
