ROXAS CITY – Ginklaro sang isa ka Iloy nga tag-iya sang balay nga ginhalinan sang kalayo sa nagluntad nga sunog sa Sitio Plaridel, Barangay Cagay, sini nga syudad, nga wala sang posporo nga ginhampangan ang iya bata.
Sa interview sang Bombo Radyo kay Jonalyn Delantar, suno diri, kahapon nga adlaw sang Biyernes, nagapanglaba ini samtang ang iya anum ka bulan nga bata ang nagakatulog sa duyan sa ila ibabaw nga bahin sang balay, kag yara naman sa idalom nga bahin sang ila balay ang iban pa sini nga kabataan.
Nakibot nalang ini nga gulpi naghibi ang iya bata nga yara sa duyan kag sa iya pagtsekyar, nakita sini nga nagadaba-daba na ang kalayo sa ila bintana.
Wala na sini gindumdom ang iban pa nila nga kagamitan, kundi gin-una nga masalbar ang iya apat ka mga kabataan.
Nahibaluan nga sa trabaho ang iya bana nga manugpang-scrap sang natabo ang insidente.
Nangin emosyonal man ang Iloy matapos nga kadasig gintupok sang kalayo ang ila balay, kag masakit para sa iya bangud isa pa lang ka tuig nga nakapatindog sila sang ila kaugalinbgon nga balay nga nagabalor sa P30,000 kag tubtob subong suno diri nga ila pa ini ginabayaran.
Nakapalab-ot naman suno diri sang bulig ang City Government kag nagapasalamat gid ini, apang kinahanglan pa nila sang bulig pinansyal nga ipakay-o sang panibag-o nga balay.
Sa mga luyag magbulig sa mga nasunogan, magpadulong lamang sa brgy. Hall sang brgy, cagay, ukon mahimo nga mangin tulay ang ini nga istasyon para sa pagdul-ong sang inyo bulig.
