ROXAS CITY – (UPDATE) Indi bangud nag-lider sa team pulahan ang bata sang mag-asawa nga senior citizen, ang rason sa pagpaguba sang ila balay.
Ini ang ginklaro ni Mr. Emil Miraflores, tag-iya sang duta nga ginatindugan sang balay sang mag-asawa nga Florencia Tizon 84, kag Joseph Tizon 89-anyos sa Barangay Libas, sini nga syudad.
Sa interview sang Bombo Radyo kay Miraflores, ginpahayag sini nga wala sang labot ang pulitika sa iya desisyon nga ipaguba ang amu nga balay, kundi pagkapikon sini kay Catalina ‘Taling’ Tizon nga gina-post ini sa social media kag ginahangkat nga magpakita sang titulo sang amu nga duta.
Suno pa diri, apisar nga empleyado ini sa karon sa administrasyon sang kasumpong nga hubon sang mga pulahan, wala ini sang ginadampigan bangud lunsay pamilya sini ang magtimbang nga kampo.
Indi man matuod nga ginpahog sini nga pagapatyon ang nag-lider sa team pulahan, kag ‘expression’ lang sini ang ‘piangon taka karon’.
Aminado si Miraflores nga nagulpihan ini sa pagmandu nga ipawasak ang porsyon sang balay sang mag-asawa nga sakup sang ila propedad.
Apang, ginpahayag sini nga gin-abisuhan niya sang nagliligad nga tuig ang anak sang mag-asawa nga maghalin sa ila duta bangud may proyekto ini nga igapatindog.
Sa karon, ginpromisa ni Miraflores nga pagaplastaran sini sang maistaran sa likod, ang mag-asawa nga tigulang.//END
