Ginapanindugan karon ni Mr. Dante Ignacio, tag-iya sang duta sa diin ginpatigayon ang quarry operation sa Purok 4, Barangay Acbo, Sigma, Capiz nga libre ang lapok kag buga nga ginagamit sa pagtambak sa lubakon nga karsada sa nagkalain lain nga barangay sa nasambit nga banwa.
Sa pagpakig-angut sang Bombo Radyo kay Ignacio, ginpahayag sini nga nagsugod ang pagkuha sang lapok nga ginatambak sa lubakon nga barangay road sang nagligad nga bulan sang Marso.
Suno diri nga si Kapitan Ponsaran ang una nga nakig-transaksyon sa iya nga kabaylo sang libre nga lapok kag buga nga makuha sa quarry site ang pagpatapan sa nabukid nga porsyon sang ginapanag-iyahan nga duta ni Ignacio nga gamiton sa pagpatindog sang balay sang mga kabataan sa pila ka adlaw.
Ginpahayag ni Ignacio nga wala ini sang ihibalo nga kinahanglan pa nga magpangayo sang permit sa gobyerno probinsiyal antes magpatigayon sang quarry.
Liwat sini ginklaro nga wala sang may ginbayaran sa iya ang LGU – Sigma pag-abot sa buga nga ginakuha sang mga heavy equipment bangud ini ang libre nga ginhatag bilang bulig sa mga pumuluyo nga madugay na nga nagasakripisyo bangud sa lubakon nga dalan.
