Wala naglaum ang tag-iya sang duta sa diin ginpatigayon ang quarry operation sa Barangay Acbo, Sigma, Capiz nga wala sang permit para sa nasambit nga operasyon.
Ginpahayag ni Kagawad Danny Esico tag-iya sang bukid nga ginpatigayon ang quarry operation nga nagkampante ini nga wala sang mangin problema sa ila transaksyon bangud ang nangin ka-estorya sini amo sanday Kapitan Paul POnsaran kag Mayor Christopher Andaya sang Sigma.
Ginpanindugan man ni Esico nga libre ang buga kag lapok nga ila nakuha sa quarry operation nga gamiton sa pagpatambak sa mga lubakon nga karsada sa mga barangay sa Sigma sa diin kabaylo sini ang pagpatapan sang bukid gamit ang heavy equipment sang banwa.
Matandaan nga ginhold kag ginkuha sang CAPENRO ang yabi sang backhoe nga nagpatigayon sang quarry operation bangud sa paglapas sa Ordinance No. 011 Series of 2019 sang Revised Revenue Code of the Province of Capiz.
