Tag-iya sang duta nga naapektuhan sang Roxas City Circumferential Road, magapangayo sang bulig kay Cong. Billones agud makuha ang iya ‘just compensation’

ROXAS CITY – Plano sang 81 anyos nga lot owner nga si Manuel Alamodin nga magpangayo sang bulig kay Capiz 1^st district Congressman Emmanuel ‘Tawi’ Billones Sr. agud mapadasig ang pagproseso sang iya nga just compensation ukon bayad sa duta nga nasakop sa construction sang Roxas City Circumferential Road.

Kasunod ini sang pagkabati ni Alamodin sa Bombo Radyo nga magapain sang pondo ang kongresista para sa pagpadayon sang amo nga proyekto sini nga tuig.

Suno kay Alamodin nga madugay na niya ini nga ginapalab-ot sa talatapan sang Department of Public Works and Highways apang kasubong nga ginapaawat-awatan lamang ini.

Ginpahayag ni Alamodin nga masobra 2 milyones pesos ang iya natalana nga batunon gikan sa gobyerno bangud sa iya nga duta nga matandog bangud sang amo nga proyekto.

Nagahinyo ini nga mapadasig na ang pagproseso sini bangud tigulang na sila sang iya nga asawa kag madamo man sila sang galastusan kapareho sang pagpabulong kag pang-adlaw-adlaw nga kinahanglanon.

Mahibaluan nga halos apat ka tuig na nga wala mabayadan sang DPWH ang kapin sa 592 square meters nga lote ni Alamodin nga nakasugtan nga pagabaklon sa balor nga P3, 300 per square meter.